Zëvendësministri shitet si “Boss” para policëve, i kërcënon rëndë pasi që e dënuan

Zëvendësministri i Arsimit, Arbër Geci ka kërcënuar dy zyrtarë policorë që kanë qenë duke i shqiptuar tiketë vëllait të tij, për kundërvajtje në trafik. “Mbaje mend ki me pa ti se kush jam unë që po e shqipton tiketën”, u ka thënë ai duke ua kërkuar edhe numrat për “me ju raportu te ministri”.

Arbër Geci zëvendësministër i Arsimit, ka penguar zyrtarët policor në kryerjen e detyrave zyrtare, duke i kërcënuar.

Insajderi merr vesh se policia ka qenë duke i shqiptuar një tiketë për kundërvajtje në trafik vëllait të zëvendësministrit Geci, pasi që vetura e tij ka qenë e parkuar në hapësirë që nuk është e lejuar, në rrugën “Rrustem Statovci”, në Prishtinë.

Geci, i cili fillimisht nuk kishte qenë i pranishëm, ishte afruar duke u prezantuar si VIP, para policëve. Siç merr vesh Insajderi, ai i ka kërcënuar policët duke u thënë “keni me pa kush jam unë që po e shqipton dënimin”, dhe me fjalët “ama numrin se ke me pa kush jam unë dhe këtë kam me raportu te ministri”.

Polici zyrtar i kishte kërkuar Gecit disa herë që të largohej pasi që ai nuk kishte kryer kundërvajtje po vëllau i tij, dhe se ai është i barabartë siç do qytetar tjetër, por Geci kishte vazhduar me kërcënime.

Rasti ka ndodhur të enjten rreth orës 09:50, në rrugën “Rrustem Statovci”, në Prishtinë.

Lidhur me këtë rast është informuar edhe njësia e hetimeve, të cilët po ashtu e kanë lajmëruar edhe prokurorin kujdestar.

Reklama