Valdete Daka: Me presidentin biseduam për afatet kushtetuese për mbajtjen e zgjedhjeve dhe buxhetin

Kryetarja e KQZ-së, Valdete Daka, dhe presidenti Hashim Thaçi, sot diskutuan për afatet kushtetuese për mbajtjen e zgjedhjeve dhe buxhetin.

Mëngjesin e sotëm Daka e Thaçi mbajtën takim në të cilin u diskutua mundësia e shkuarjes në zgjedhje. Pas takimit, Valdete Daka u prononcua për media.

“U diskutua për afatet kushtetuese në qoftë se mbahen zgjedhjet. Ato janë çështje që diskutohen pasi të shpallen zgjedhjet. Nëse shpallen KQZ-ja kërkon mjetet e nevojshme nga qeveria dhe vendoset për buxhet sepse ky muaj ka qenë vit zgjedhor dhe nuk e kemi pas buxhetin e nevojshëm”, tha Daka.

Ajo tha se nuk është folur për datën e zgjedhjeve.

“Nuk u diskutua për datë, për zgjedhjet e jashtëzakonshme ne gjithmonë kemi opsione tjera”, përfundoi ajo.

Presidenti Hashim Thaçi ka pritur në takim kryetaren e Komisionit Qendror të Zgjedhjeve (KQZ), Valdete Daka.

Thaçi dhe Daka u konsultuan për hapat e mëtejshëm në rrethanat e krijuara politike, pas dorëheqjes së kryeministrit Ramush Haradinaj. Ky takim ishte i mbyllur për media.

Reklama