Sot festohet 28 Nëntori, festa më e madhe e Kombit Shqiptar

Në kushte aspak normale për shkak të koronavirusit, Shqipëria feston sot ditën e pavarësisë dhe të flamurit.

Kjo datë shënon dy ngjarje të rëndësishme në historinë e kombit tonë, në 1443 heroi ynë kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin kombëtar mbi kalanë ndërsa më 28 nëntor 1912 u shpall Pavarësia e Shqipërisë nga Ismail Qemaili i cili ngriti flamurin në Vlorë

Sot, 28 nëntor Shqipëria feston ditën e flamurit dhe të pavarësisë. Për të dytin vit radhazi,  ndodhet në një situatë aspak normale.

Kujtojmë që një vit më parë, e gjithë Shqipëria ishte në zi kombëtare gjatë kësaj periudhe për shkak të tërmetit që u mori jetën 51 qytetarëve. Ndërsa tani ndodhemi nën “kthetrat” e një pandemie globale, në përballje me koronavirusin.

Për shkak të rritjes së numrit të të infektuarve dhe masave kufizuese, qytetarët shqiptarë nuk mund të grumbullohen për të festuar, kjo për të parandaluar dhe përhapjen e mëtejshme të virusit.

Edhe pak ditë më parë, Ministria e Shëndetësisë u bëri apel qytetarëve shqiptarë që të qëndrojnë në shtëpi gjatë festave kombëtare dhe të festojnë me familjarët e tyre.

“Patriot është ai që qëndron në shtëpi dhe mbron familjen nga infektimi” – tha ministrja Ogerta Manastirliu.

28 Nëntori është ditë e veçantë për shqiptarët. Në këtë datë në dy vite të ndryshme kanë ndodhur dy ngjarje historike që kanë shenjuar historinë e Shqipërisë.

Në vitin 1443, më 28 nëntor heroi ynë kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin kombëtar mbi kalanë e saj. Ndërsa më 28 nëntor 1912, i quajtur gjithashtu si Nëntori i dytë, u shpall Pavarësia e Shqipërisë nga Ismail Qemaili i cili ngriti flamurin në Vlorë.

Reklama