Rikthimi në skenë i bendit “Minatori” mbylli “Hardh Fest”-in

Minatori është grup artistësh i njohur. I takojnë gjeneratës kur muzika është dëgjuar e ndjerë. Andaj zbrazësia që ata kanë lënë në skenën shqiptare çdo ditë e më shumë po len gjurmët e saj. Rok bendi ‘Minatori’ ndonëse prezent kohë pas kohe nëpër mbrëmje të ndryshme, ka vjet që s’kanë sjell në skenë një këngë të re.

Ani pse kërkesat për rikthimin e tyre janë të shumta, solisti i ‘Minatorit’, Naser Gjinovci ka bërë të ditur arsyet e mos pranisë së tyre në skenë. “Ka kohë që po flasim të vijmë me diçka të re. Por përveç dashurisë për muzikën, ne të gjithë punojmë, dhe secili nga ne, kemi përgjegjësit publike. Dhe kjo pak e penalizon punën tonë në art”.

Gjinovci ka treguar se për të qenë i mirë në muzikë, duhet përkushtim maksimal. “Jemi të ndarë në dy aspekte. Në njërën anë puna që sot e bëjmë e në anën tjetër nëntë albume dhe 2700 koncertet. Dhe kjo automatikisht rrit kriteret. Ndërsa për t’u rikthyer si duhet në skenë nevojitet përkushtim maksimal. Muzika është si dashuria. Të kërkon 100 për qind”, ka shpjeguar këngëtari.