Ramush Haradinaj niset për Hagë: Jam i palëkundur, i patrazuar dhe ballëlartë

Është nisur për në Hagë kryeministri në detyrë Ramush Haradinaj, ku është ftuar nga Tribunali Special për t’u intervistuar në cilësinë e të dyshuarit.

Haradinaj ka publikuar një shkrim para nisjes, ku shihet në një fotografi duke hyrë në veturë për t’u nisur drejt aeroportit.

Ai ka thënë se luftëtarët e lirisë gjithmonë ishin të rreshtuar me të drejtën.

“Sot, si Ramush Haradinaj, qytetar i Republikës së Kosovës, i përgjigjem ftesës për intervistim nga Dhomat e Posaçme në Hagë. Tërësisht në të drejtën e Kosovës, i palëkundur për vendimet e mia jetësore dhe i patrazuar e ballëlartë. Kosova ka ecur përpara në rrugëtimin euro-atlantik dhe është më e fortë se kurrë, në rreshtin e paqes dhe miqësi të përhershme me ShBA-në. Kosova është e gatshme të dialogojë me Serbinë deri në arritjen e një marrëveshjeje finale ligjërisht obliguese, përfshi njohjen reciproke në kufijtë ekzistues. Por, tregun e japim vetëm për njohje. Me nder kam mbrojtur të drejtën tonë, dje, sot dhe do ta mbrojë gjithmonë!”, ka shkruar Haradinaj. /RahoPress/

Reklama