Pse ranë kaq shume rastet me Covid-19 në Kosovë? Flet Lul Raka

Lul Raka flet për arsyet e rënies së rasteve të infektimit me Covid-19 në Kosovë, ndonëse qytetarët nuk janë vaksinuar akoma.

Derisa para një muaji Kosova regjistronte mbi 500 raste të reja të infektuara me COVID-19, së fundmi numri i rasteve të reja ka rënë nën 50. Gjatë ditës së djeshme në vend u raportuan 14 raste të reja të infektuara me këtë virus, rreth 500 më pak se që janë raportuar para një muaji.

Mikrogiologu Lul Raka ka thënë për Express se në uljen e rasteve të reja me COVID-19 dhe numrit të viktimave nga ky virus kanë ndikuar shumë faktorë.

Ai përmend zbatimin e masave parandaluese nga qytetarët, uljen e kontakteve me njerëzit e vaksinimin.

“Ulja e rasteve të raportuara të infeksionit dhe të vdekjeve nga COVID-19 është lajm jashtëzakonisht i mirë. Në këtë epilog kanë ndikuar shumë faktorë, siç janë: zbatimi i masave parandaluese nga vetë qytetarët e Kosovës; ulja e kontaktit të njerëzve, si rrjedhojë e masave kufizuese; përmirësimi i motit, që ndikon në qëndrimin e njerëzve në hapësira të hapura, ku mundësia e infektimit është shumë më e ulët sesa në mjedise të mbyllura e të dendura; prekja e një numri të konsiderueshëm të njerëzve deri tani (edhe pse ende nuk e dimë numrin e përafërt të tyre); vaksinimi, edhe pse simbolik ka mbuluar kategoritë e të moshuarve dhe shumë personave me sëmundje shoqëruese, të cilët e kanë shkallën më të lartë të vdekshmërisë dhe spitalizimit dhe mbikqyrja nga autoritetet përkatëse (policia e inspektorati). Se në çfarë përqindje kanë ndikuar këta faktorë veç e veç, nuk e di”, ka deklaruar ai.

Raka ka thënë se gjatë ditëve në vijim pritet përshpejtim i dinamikës së vaksinimit, gjë që mund të ketë rol shumë të rëndësishëm në përballjen me pandeminë.

Përndryshe, ai është shprehur se është koha që të rishikohen edhe masat kufizuese të marra.

“Ajo që na pret ditëve në vijim është përshpejtimi i dinamikës së vaksinimit, që mund të ketë rol shumë të rëndësishëm në përballjen me pandeminë. Konform situatës së posakrijuar dhe duke marrë në konsideratë mirëqenien socio-ekonomike dhe shëndetin mental, mendoj se është koha e rishikimit të masave kufizuese. Po ashtu, nevojitet një partneritet i sinqertë dhe bashkëpërgjegjësi mes lidershipit dhe popullatës në këtë përballje, që do të lehtësonte rrugën drejt rikthimit të shumë aktiviteteve vitale për shoqërinë. Kujdesi duhet vazhduar edhe më tej në mënyrë që rritja eventuale e rasteve të reja të jetë e menaxhueshme nga institucionet shëndetësore”, ka shtuar ai.

Sipas të dhënave të Instituti Kombëtar të Shëndetit Publik, numri total i rasteve pozitive me COVID-19 është 107 mijë e  258 raste nga 593 mijë e 728 persona të dyshimtë në virusin SARS-CoV-2.

Ky numër vlerësohet të jetë shumë më i madh, për shkak që shumë qytetarë kanë kaluar virusin edhe pa simptoma.

Ndërsa, deri tani 2 mijë e 240 persona kanë vdekur si pasojë e infektimit me këtë virus.

Reklama