Pjepri FOX F1 që kultivohet nga familja Morina në Xërxë të Rahovecit – Video

FOX F1 është lloji i pjeprit, i cili tash e 10 vjet kultivohet nga familja Morina në Xërxë të Rahovecit.

Sipas fermerit Lendrit Morina, katër hektarët e mbjellë me këtë frutë sjellin rreth 200 tonë pjepra brenda vitit.

E arsyeja pse punën e tyre me kultivime e kanë përqendruar në këto dy pemë ka të bëjë me vlerat ushqyese dhe me të mirat që vijnë nga to.

Përveç Morinës, efektin pozitiv të pjeprit e konfirmojnë edhe shumë hulumtime shkencore.

Ndikon në qarkullimin e zemrës, të gjakut, shton energjinë e edhe përmirëson strukturën e lëkurës.

Temperatura e lartë, 55 gradë, e bën më të vështirë qëndrimin në serrë, andaj puna brenda zhvillohet vetëm në orët e hershme të mëngjesit e ato të vonshme të mbrëmjes.

Duhet një përkushtim i shtuar kur vjen puna tek kultivimi i pemëve e sidomos tek ato sezonale. E për këtë familja Morina është përkujdesur të përdorë metodat më të përshtatshme.

Kushtet që i kërkon pjepri për kultivim po ashtu janë të rëndësishme, sepse, sipas fermerit, është frutë e ndjeshme.

Sipas Morinës, meqenëse çmimet janë të arsyeshme e nevoja për to është e lartë në këto periudha, rezultatet nga shitja janë të kënaqshme.

E përveç pjeprit, edhe shalqiri hyn në rangun e kultivimeve nga familja Morina.

Ka rreth 7 vjet që dy hektarë të tokës së tyre i kanë të ndarë për mbjelljen e frutës së verës.

Sipas 25-vjeçarit, edhe shalqiri kërkon punë e përkushtim me muaj deri në fazën finale të vjeljes.

E përbashkëta e pjeprit dhe e shalqirit sipas Morinës, është përbërja e lartë e ujit tek to, por jo vetëm.

Ai numëron edhe llojet e vitaminave që mund t’i gjejmë në të.

E kur bëhet një krahasim mes frutave sa i përket përfitimit, fermeri thotë se pjepri ka një përparësi për shkak të çmimit më të lirë në treg.

Hidratimi është i nevojshëm këto ditë të nxehta vere, andaj përdorimi sa më i madh i pemëve me përqindje të lartë të ujit ndikon që kjo të arrihet.

Reklama