Ndeshjet do të mbahen përkundër tërheqjes së KB Rahoveci, organizim e bën FBK-ja me komunën

Drejtoresha për Kulturë, Rini dhe Sport në Komunën e Rahovecit, Bjondina Kleçka, ka thënë se ndeshjet e përfaqësueses së Kosovës do të mbahen sipas parashikimeve, përkundër vendimit të KB Rahoveci për tërheqje nga organizimi i ndeshjeve për Kosovën.

Kleçka, ka lënë të nënkuptohet se përgjegjës përfundimtar për organizim e këtyre ndeshjeve, siç janë dy ndeshjet e radhës së Kosovës me Anglinë e Luksemburgun, është Federata e Basketbollit të Kosovës (FBK).

Ajo shkruan se ndeshjet do të mbahen ashtu siç janë paraparë, në palestrën e qytetit të Rahovecit “Mizahir Isma”

“Ndeshjet e përfaqësueses së Kosovës do të mbahen! Të nderuar qytetarë të Komunës së Rahovecit, ndjej për obligim të ju njoftoj se ndeshjet e Përfaqësueses së Kosovës në basketboll ndaj Anglisë e Luksemburgut do të mbahen në palestrën “Mizahir Isma” ashtu siç është paraparë”, ka shkruar ajo.

Tutje, drejtoresha Kleçka ka shkruar se këto ndeshje i organizon FBK bashkë me Komunën e Rahovecit, duke thënë se komuna do të jetë në dispozicion për organizim sa më dinjitoz, duke shprehur keqardhje për tërheqjen e KB Rahoveci.

“Këtë ndeshje e organizon Federata Basketbollit të Kosovës dhe Komuna e Rahovecit e ka siguruar Federatën se do jemi në dispozcion për një organizim sa më dinjitoz dhe se shtëpia e Rahovecit është edhe shtëpi e Kosovës. Falënderojmë KB Rahovecin që ka shprehur interesim për organizim dhe na vjen keq që është tërhequr, megjithatë ne jemi të hapur për bashkëpunim me çdo klub sportiv, siç edhe e kemi dëshmuar deri sot”, ka shkruar ajo. /RahoPress/

Reklama