Ndërmarrjet private ndihmojnë 400 familje të Komunës së Rahovecit

Tri ndërmarrje të mëdha biznesore kanë ndihmuar sot 400 familje të komunës së Rahovecit me 400 thasë miell, 800 litra qumsh dhe 800 litra lëngje.

Kryetari Smajl Latifi ka thënë se këto ndihma, në gjendjen që po kalon i gjithë vendi, janë të nevojshme për familjet rahovecase në nevojë.

“Në këtë gjendje nëpër të cilën po kalon vendi ynë, në një kohë kur pandemia globale Covid 19, ka marrë përmasa të shtrirjes edhe në Kosovë, bizneset tona po vazhdojnë, traditën, humanizmin dhe solidaritetin, në mbështetje të qytetarëve. Në këtë kuadër kompanitë: “Elkos Group-Etc”, “Devolli Corporation”, “Devolli Group”, sot kanë ndihmuar 400 familje në komunën e Rahovecit me: 400 thasë miell, 800 litra qumësht dhe 800 litra lëngje. Në donacion bëjnë pjesë artikujt themelorë strategjik, nga të cilat, për qytetarë, ndahet: 1 person (kryefamiljarë) = 1 thes miell, 2 litra qumësht dhe 2 litra lëngje, artikuj këta bazik për menaxhim të kësaj faze. Gjatë shpërndarjes, përfaqësuesit e Komunës dhe Stacioni Policor në Rahovec do të asistojnë për mbarëvajtjen e procesit si dhe mbajtjen e rendit (distancës) sipas masave të nxjerra nga institucionet tona”, ka njoftuar Latifi.