MEXICO CITY, RAHOVECI, (BARI I KOSITUR)

Autor: Xhevdet BAJRAJ

Dje e gjeta një copë të atdheut
në aromën e barit të porsaprerë në Parque México
u ngjita në majë të mallit dhe Anadrinia më doli para syve
si
grua e rrallë që ta trazon shpirtin

Pastaj me Enrique Serna-në në kafenenë “Punto y Coma”
tërë ditën u luta që të bjerë pakëz shi se zemra më digjej
Carlos Santana na mbante ritmin
derisa na u dehën zogjtë e këmbëve dhe ikën në gjumë
por shi nuk ra se nuk ra

México…
e bukur është si sytë e vashës nga Kosova
gati mund ta krahasoj me një gjethe hardhie rrushi të zi
që ma sjell era e malit
o mallit për Rahovecin tim

Ama…

Në Kosovë tani
është pranverë dhe të ftohtit vazhdon të kafshon
si kafshë që e këputi zinxhirin dhe nuk e di se çdo të thotë liria
derisa në mes të vreshtit
në një shtëpi të papërfunduar
tërë jetën ndërtuar me tullat e kuqe të ëndrrave
dy pleq mërdhijnë nga vetmia

Brezi 9, Tetovë

Reklama