Hoti paralajmëron kthimin e karantinës

Kryeministri i Kosovës, Avdullah Hoti ka bërë të ditur se ka mbledhur Komitetin për Pandeminë për të diskutuar rreth masave që duhet të merren, shkaku i rritjes së numrit të të infektuarve me koronavirus.

Takimi, të hënën, është i mbyllur për medie, derisa është paralajmëruar konferencë pas tij.

I pranishëm përpos Hotit është edhe ministri i Shëndetësisë, Armend Zemaj.

Karantinimi në qytete me shumë raste me koronavirus mund të kthehet. Një mundësi të tillë e ka lënë të hapur kryeministri i Kosovës, Avdullah Hoti të hënën. Ai ka folur pas mbledhjes së Komitetit për Pandeminë.

“Jemi duke diskutuar për karantinimin ku ka më së shumti raste. Duhet të rregullojmë pak më mirë ceremonitë mortore. Policia do të merr të gjitha autorizimet e nevojshme. Të gjitha resurset i kemi vënë në funksion”, ka thënë Hoti.

Ai ka thënë se në mbledhje është diskutuar për gjendjen e krijuar. Kryeministri Hoti ka theksuar se nuk mund të lejohet që gjendja të dal jashtë kontrollit.

“Kemi 49 raste me fatalitet, Klinika Infektive është e stërmbushur, nuk ka më vende për njerëz. Janë duke u krijuar vende në klinika tjera. Masat janë të thjeshta, maskat, distanca dhe larja e duarve. Jemi të obliguar t’iu përmbahemi”, ka theksuar Hoti.