Haradinaj: Kosova në duar të mafisë energjetike

Kreu i AAK-së, Ramush Haradinaj, e ka quajtur gabim strategjik anulimin e projektit Kosova e Re i nënshkruar me kompaninë amerikane Contour Global, duke thënë se nuk e ka besuar që kjo do të vijë për një kohë të shkurtë.

“Kur ne kemi nënshkruar marrëveshjen në vitin 2017 për investim prej 1.3 miliardë euro, ne kemi qenë të vetëdijshëm se thëngjilli nuk është e ardhmja e energjisë por, Kosova nuk ka pasë alternativë të shpejtë që ruan qytetarin, garanton zhvillim ekonomik dhe ruan pavarësinë energjetike të Kosovës. Ne nuk ishim vend aq i zhvilluar që me lehtësi dhe pavarësisht kostos së lartë, kalon në energji alternative. Me 500MË që do të prodhoheshin dhe me 10.000 vende të reja të punës që do të krijoheshin, ne kemi besuar se dëmet në ambient do të ishin të pranueshme, në raport me përfitimet që do të kishte Kosova”.

Haradinaj ka thënë se është fyer dhe linçuar për atë se “çmimi i energjisë i garantuar prej 80€ MW është tejet i lartë dhe se ky çmim do të shkatërrojë ekonominë e Kosovës e lloj-lloj sharjesh tjera”, duke shtuar se të kota i ka pasë sqarimet se të gjitha parashikimet ishin se çmimet e energjisë së vitit 2017 ishin të paqëndrueshme.

“Kam qenë i bindur se shpesh këto fushata kanë qenë të orkestruara dhe financuara nga mafia energjetike e cila meqenëse veç kishte gjetur strehë tek lëvizja Vetëvendosje me ndërtimin e kapaciteteve të reja do të humbiste një treg të madh siç është tregu i Kosovës”.

Haradinaj në reagimin e tij ka përmendur edhe raportet e zyrtarëve të KEDS dhe KOST.

“KEDS dhe KESCO gjatë tetorit të këtij viti, pra, për një muaj, përkundër motit të mirë, ka importuar 9,15 milionë euro energji elektrike me çmim mesatar prej €242 megavat/orë kurse gati dyfishi i vlerës së tetorit është importuar me çmim prej €340 me 24 Nëntor. Kërkesa është rritë me 200MË në krahasim me vitin e kaluar”.

“Nuk kam Informacione si është në dhjetor, por e qartë që në momentin e parë që ashpërsohet moti, një Zot e di sa do të jetë çmimi dhe është pikëpyetje e madhe se a do të ketë Kosova mjete që të blejë energji me çmime astronomike. KEDS dhe KESCO nuk kanë se si të i shpëtojnë kolapsit nëse trendet aktuale vazhdojnë”.

Haradinaj tha se “populizmi dhe retorika boshe e Qeverisë Kurti” i ka filluar goditjet e para për popullin e Kosovës dhe dëmet e vendimeve të gabuara strategjike për kohë të gjatë do të i paguajë qytetari i Kosovës.

“Fatkeqësisht edhe refuzimi i gazsjellësit amerikan, së fundmi, do të sjellë pasoja të paparashikueshme për pozitën energjetike të Kosovës dhe jo vetëm. Me të drejtë shtrohet pyetja: Kush janë këta njerëz që rrezikojnë stabilitetin e çmimeve dhe pavarësinë energjetike të Kosovës?!”.

Reklama