Sot u bënë dy dekada që prej çlirimit të Kosovës nga aparati serb. Pati shumë ngjarje, shumë organizime e tubime përkujtuese. Në Kosovë sot qëndruan edhe dy njerëzit kyç të çlirimit të Kosovës, Presidenti Bill Clinton dhe Sekretarja Madeleine Albright.
Në këtë datë të veçantë ka shkruar edhe kryetari i Rahovecit, Smajl Latifi, i cili këtë ditë e vlerëson si një prej ditëve më të rëndësishme të historisë së Kosovës
“Sot shënohet padyshim një nga ditët më të rëndësishme në historinë e re të Kosovës, Dita e Çlirimit nga pushtuesi serb! Lufta sublime e UÇK-së, sakrifica e dëshmorëve tanë dhe popullit shqiptar i cili luftoi për liri, mbrojti nderin dhe dinjitetin kombëtar dhe atdheun, e që bashkë me ndërhyrjen e forcave aleate të NATO-s, na dhanë lirinë e shumëkërkuar dhe të merituar”, ka shkruar Kryetari Latifi.
Ai ka theksuar se përjetë do ta kujtoj luftën, e cila, sipas tij, u fitua me mbështetje ndërkombëtare për të arritur deri në këtë ditë.
“Në këtë 20- vjetor, duke kujtuar të kaluarën, krahas dhimbjes dhe krenarisë që na mban të gjithëve bashkë, në duart tona është e ardhmja jonë, e cila kërkon punë të përkushtuara për atdheun dhe integrime të thelluara brenda kombit tonë, që Kosovësn tonë ta kemi një shtet për çdo ditë e më të konsoliduar, me ushtri moderne e me perspektivë të qartë euro-atlantike. Urime Liria, Kosovë Lavdi përjetë dëshmorëve dhe gjithë të rënëve për liri! Faleminderit për mbështetjen, SHBA Faleminderit, NATO!”, ka shkruar Latifi.
