Del ekspertiza, ky është shkaku i vdekjes së tre familjarëve nga Kosova te Gjiri i Lalzit

Ekspertët mjeko-ligjorë kanë dalë në përfundimin se shkak i vdekjes së tre anëtarëve të familjes Haliti nga Kosova është helmimi nga kërpudhat.

Po ashtu, po kryhen edhe analizat e ushqimeve, konkretisht të kërpudhave, që janë gjetur të gatuara në shtëpi.

Ata kishin shkuar në Shqipëri për të kaluar disa ditë pushimi, por panë vdekjen me sy teksa njëri pas tjetrit ndërruan jetë brenda tri ditëve.

Familjarët, Elfete, 78 vjeçe, djali i saj Afrimi 56 vjeç e gruaja e tij Ferzinaze Haliti, 57 vjeçe, janë tre pjesëtarët e familjes nga Gjilani, të cilët ndërruan jetë njëri pas tjetrit në Shërbimin e Reanimacionit Qendror në QSUT, pasi ishin paraqitur në gjendje tejet të rëndë me diagnozë “intoksikacion nga kërpudha”.

Prej disa ditësh, ata ndodheshin në shtëpinë e tyre të pushimit në Gjirin e Lalzit, të cilën e frekuentonin shpesh. Nëna, i biri dhe bashkëshortja e tij, mëngjesin e së mërkurës së shkuar (datë 05.05.2021) ishin nisur për piknik në zonën e Shënpietrit, ku edhe kishin mbledhur disa kg kërpudha të egra që i gatuan dhe konsumuan gjatë orëve të pasdites pa ditur se ky ushqim do të rezultonte fatal për jetën e tyre.

Reklama