Dalin pagesat e dyta të subvencioneve për bujqit

Drejtoria e Bujqësisë në Komunën e Rahovecit, ka njoftuar se Ministria e Bujqësisë ka nisur të realizoj pagesat e dyta të subvencioneve për bujqit.

Po ashtu, për shkak të vonesave të këtyre pagesave, thuhet se ministri i ri Faton Peci, ka kërkuar intensifikimin e procedimit të të gjitha pagesave direkte që janë përfitime nga viti i kaluar.

Njoftimi i plotë:

Ministria e Bujqësisë vazhdon me pagesën e dytë të subvencioneve për bujqit

Ministria e Bujqësisë, Pylltarisë dhe Zhvillimit Rural, ka rifilluar ekzekutimin e pagesës së dytë për të gjithë përfituesit e subvencioneve në kuadër të Programit të Pagesave Direkte për vitin 2020. Duke marrë parasysh vonesat e shkaktuara në këto pagesa, ministri i MBPZhR-së, Faton Peci me marrjen e këtij mandati, ka kërkuar që të intensifikohet procedimi i të gjitha pagesave direkte për përfituesit e programeve nga viti i kaluar.

Ministri Peci, ka  theksuar se një ndër prioritetet në politikat e tij do të jetë dhënia e përkrahjes ndaj fermerëve përfitues në kohën e duhur. Po ashtu, ministri ka premtuar se do të angazhohet që me shumë përkushtim të jetë afër fermerëve, me qëllim që veprimtaritë e tyre bujqësore të fuqizohen dhe zhvillohen përmes edhe mbështetjes së ministrisë.

Krahas kësaj, Peci premton se efikasiteti në punë dhe transparenca do të jenë ndër objektivat kryesore.

Reklama